Psa 51 | PMA | STEP | Ahi, emhemahisnau li, ven envatien koa mul enuk lises. Ven more enmahisien onom mariso, sahul lin tisaen keil onak.

Psalms 51

Hisien ten Mul Vis Enmahisien onen Ahi

Sam tai onen Deved navong provet Netan mai veni navong Deved mum tisa ven Batsiba (2Sam 13:13-17)

1 Ahi, emhemahisnau li,
ven envatien koa mul enuk lises.
Ven more enmahisien onom mariso,
sahul lin tisaen keil onak.
2 Kas lin sakkalkalien keil onak eli,
ka kumonau nitolas ran tisaen keil onak.

3 Nalei kilea li tounah koa romaltei en moulien onak,
lises namundem kilea sak tisaen keil onak.
4 Tisaen koa namumoni, namumoni vakatuk enges, Ahi;
sakien onak eli romaltei en metom.
Sakini mal keke kolei revi sakien keil onak,
keik komal keke kosan mahien minau.
5 Sakkalkalien keil mul tuai eli enau navong avasi nau.
Anatin, navong mama onak ro enau, natisaso tuai.

6 Keik emvati li mok makur anatinien en moulien onak,
kisien rendemien onak en meteisauen onom.
7 Kisahul lin tisaen onak keke nitolas,
kikas motein moulien onak eli hemai hoh vis hoh imok.
8 Kimaenau nilonge hetahos eris ka nito en sien,
ka avaseini mahien koa kosani minau vulvul nau, kimaenau li nimakul en sien eris.
9 Konalele natisatei li mun enau,
kisahul lin sakkalkalien keil onak.

10 Ahi kum kes moulien onak eli hemai hetolas,
kisan rendemien hau enau koa housil katuk lisenges.
11 Konasila lattei nau nanaha ranuk,
konakulattei ninin onom koa vi votut naha ranau li.
12 Kisan risi minau sien koa nakuri mulamu navong komutut nau,
ka kumonau li ekhehati malong katuk en tounah vasi.
13 Navong kosak revi nau, inau suk, nihisein meatin tatisa keil en mengkatien keil onom,
ka keil emun ihiles ka iha ris venuk.

14 Ahi, kutut moulien onak, konamaentei nau li nanamat,
ka inau nimakul usil maluen onom hetal min sien.
15 Ahi Asuv, kikataunau li maselus,
ka nihati lat isom hetal rek.

16 Emrovattei keke nuas tirendan keil ihi sanien votut minuk.
Munak ninit sanien onak hehat minuk, kirsiktei veni.
17 Sanien votut onak koa nisani minuk Ahi hehi rendemien tai koa merau.
Keik kosakras kovasesein meatin koa tin mah ven tisaen keil onen ka koa viles moulien onen ran keil.

18 Ahi onak, kum kes vieh ten taon ten out Serusalem,
kitie lat tahosien onom ka kikataun Serusalem koa mul en Vatihou Saeon.
19 En avong koanek, kilonge hetahos eris ven sanien votut koa mal,
ka en sanien keil koa meheniti heha venuk.
En avong koanek, mehouas buluk keil ka meheling keil iha en ahor ten sanien heha venuk.